1Cor 6 | DOB | STEP | 'Ebweu wate yage 'ebe omayamaya 'emiya 'imiyami, nate 'imi etala 'ediya toloinao nigeya totapwalolo 'ediya watautauya, ta esiya 'ilobwenemi toekalesiyao 'ediya watatauya.

1 Corinthians 6

Etala manuna

1 'Ebweu wate yage 'ebe omayamaya 'emiya 'imiyami, nate 'imi etala 'ediya toloinao nigeya totapwalolo 'ediya watautauya, ta esiya 'ilobwenemi toekalesiyao 'ediya watatauya.

2 Wada nuwa'i'isi 'aene 'abo'ada Yesu 'ana toemisao ma'etamo yage maibo'ana tada loinedi, 'enega sawesawemiya be yage gidalidi etala 'ediya wada loinedi. 3 Ma'etamo galewaya aniloseyao wate tada loinedi, 'enega gete tuga sawesawedaya be guinuwa bale'uya taloinedi.

4 'Enega geya'abo watautauya toloinao taudi nigeya siekaekalesiya 'ediya. 5 Nate yage 'ebe omayamaya. 'Enega 'abo yaita 'emiyega nuwanuwana be gosiyana ma'iyana sietala, 'ilobwenedi be 'ebweu tomwalatoi boda ekalesiya 'enega si'ebesa, be tauna etala nina manuna 'ida loina. 6 Ta esi 'omi 'imi guinuwa nigeya palupaludi, manuna taudi nigeya Keliso 'ana toemisao matadiya waetaetala.

7 'Omi toekalesiyao 'abo waetala, 'ana 'ita nigeya bobo'ana, ta 'eguma mwau 'emiya siapweapwesa, 'ilobwenemi be 'ami tokaboyao nidi wae'alama'i'itanedi ta geya'abo waetaetalaedi. 8 Ta esiya 'omi toekalesiyao tasimiyao ni'atu wakaboedi ta 'ediyega wa'ipwala. 9 'Enega 'imi bubuna nadigega manuna geya'abo Yaubada 'ina 'ebeloina 'ena walugulugu, manuna toto'umalidi maibo'adi Yaubada 'i'etobodedi, nadigega tolonabwasuwao be toloyaweyao be loelata nina waine dimo ma'ediyao siguiguinuwe be tai dimo ma'ediyao siguiguinuwe, 10 be to'ipwalao be tolomatagwegweyao be tonuma bwasi waiwai be tolo'aegilao be tokaboyao.

11 Manuna 'aimi lowa wabubuna nadigega, ta esi gete tuga Yaubada ni'atu 'i'utumi ga wa'esasemi, manuna 'ida 'Inapwana Yesu Keliso 'ana esanega, ta Yaluyaluwa Tabuna 'ina guinuwega, ni'atu 'igiepaepalumi.

Loelata manuna

12 'Ebweu ona yanonona, manuna 'aina tomota sigwae, “Bubuna maibo'ana kapekapeyana 'eguya.” Ona'ai'aila sawesawedaya yage maibo'ana taguinuwedi, ta nate namo 'aina bubuna nigeya sida lemeda, manuna ma idi waiwai be sawesawenaya siyonida.

13 Wada nuwa'i'isi masula manuna. Ona'ai'aila, masula gamwada manuna, ta wate gamwada masula manuna, ta esi ma'etamo masula be gamwada Yaubada 'ida loesawalidi. Ta bwalada Yaubada 'i'ebwa'eda nigeya loelata manuna, ta tauna esiya manuna, be tauna 'abo'ada manuda, 14 be wate tauna 'ina waiwaiyega mwawasega 'ida gietoolo limada, nadigega 'ida 'Inapwana Yesu mwawasega 'igietoolo limena.

15 Ooda nate Keliso welawela'anao, 'enega geya'abo yaita 'oyo tosogala ma'iyayo wabubuna geyogeyoi. 16 Manuna 'abo yaita tai tosogala ma'iyana siloegesi nate ni'atu sie'ebweu, nadigega Buki Tabu 'isimana tubwe gete manuna, 'igwae, “Siteluwa sie'ebweu, 'atuwa tuga oodi 'ebweuna.” 17 Ta esi 'abo 'ida 'Inapwana ma'iyayo wae'ebweu yaluyaluwami wate sie'ebweu.

18 'Enega 'ilobwenemi be loelata waguitoyase, manuna loelata nigeya nadigega mali bubuna to'umalidi. Ona'ai'aila, mali bubuna to'umalidi nigeya ooda sida gieto'umaliyedi, ta loelata esi ooda 'igiegie to'umaliyedi.

19 'Enega wada nuwa'i'isi 'aene ooda Yaluyaluwa Tabuna 'ina anuwa, manuna Yaluyaluwa Tabuna nina Yaubada 'enega 'imai ga soladaya 'imiyami, 'enega geya'abo tauda taloiloineda, ta esi Yaubada 'ida loineda. 20 Manuna ni'atu 'iemaisida, 'enega 'ilobweneda be ooda 'ediyega 'ana esana tada giesinabwa.